Na tarde deste sábado 22 de novembro, festa de Santa Cecilia e Día Internacional da Música, o director da Fundación Catedral de Santiago, Daniel Lorenzo, e a xerente do Centro Superior de Música de Galicia, María Jesús Rey, asinaron un convenio de colaboración polo que alumnos do centro poderán participar en actividades musicais vencelladas coa catedral.

Neste sentido, a Catedral vai colaborar co centro creando un programa de bolsas de apoio a estudantes que participen en actividades musicais da Catedral, en determinadas celebracións litúrxicas e actos culturais ao longo do ano, xunto cos recursos musicais habituais da Catedral (coros, cantores e organistas). A finalidade é contribuír á formación musical de estudantes de alto nivel, á vez que se pode manter viva a tradición musical da Catedral e favorecer a composición de nova música sacra ou aportar arranxos instrumentais para uso litúrxico. Deste xeito, podese garantir un repertorio musical de calidade nas celebracións litúrxicas e colaborar na produción de actividades culturais.

O Centro Superior de Música de Galicia, ubicado na localidade de Valga, é un centro educativo musical con máis de vinte anos de experiencia, que xurde da demanda de formación especializada, dinámica e de primeiro nivel, e que conta cun profesorado formado por músicos en activo de recoñecido prestixio.